Islamic

دعا
۔۔۔
ایک بادشاہ کسی شخص سے کہے کہ کیا مانگتے ہو؟کیا خواہش ہے؟
تو وہ شخص نہایت خوش ہوکر پوری دلجمعی کے ساتھ اپنی خواہشات بتانا شروع کردے گا۔
اسے معلوم ہے کہ بادشاہ کے کہنے کا کیا مطلب ہے؟
اور بادشاہ کے خزانے سے اس کی تمام خواہشات پوری ہوسکتی ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اسی طرح ایک ہستی ایسی ہے
جو" مالک الملک" ہے
جو بادشاہوں کی بھی مالک ہے
اس کے خزانوں میں کسی چیز کی کمی نہیں،
اس نے اپنی مخلوق سے کہا ہے کہ مانگو،مجھ سے مانگو،میں عطا کرنے والا ہوں۔
اور یہ عظیم ہستی "اللہ تعالیٰ" کی ذات ہے
اور
یہ مانگنا" دعا" ہے۔
۔۔۔۔۔۔۔۔۔۔۔۔۔۔۔۔۔
موقع ہو تو انسان بیٹھ کر،سکون سے،ہاتھ اُٹھا کر دعا مانگتا ہے
اور
اگر موقع نہ ہو تو چلتے پھرتے،دل ہی دل میں بھی دعا مانگ لیتا ہے۔
دونوں کی عادت پختہ ہونی چاہیے،ہر چھوٹے بڑے کام میں اللہ سے مانگنا چاہیے۔
یااللہ!بازار جارہا ہوں،ہر قسم کی خیر عطا فرمانا،ہر قسم کے شر سے بچانا،خسارے کے سودے سے بچانا،جو چیز خریدوں وہ اچھی ملے،نقص سے پاک ہو۔
یااللہ!رکشہ ڈھونڈنے کھڑا ہوں،مناسب کرائے والا مل جائے،ڈرائیور بھی اچھے اخلاق والا ہو۔
بس ہر جگہ دل ہی دل میں اللہ سے مانگنے کی عادت بنا لیں،آہستہ آہستہ عادت ہوجائے گی تو معلوم ہوجائے گا کہ یہ کتنا پرُلطف اور بابرکت کام ہے۔
ہر وقت اللہ کے ساتھ ہونے کا احساس عجب بہار اور طمانیت لئے ہے۔
۔۔۔۔۔۔۔۔۔۔۔۔۔۔۔۔۔۔۔۔۔
جب تسلی سے بیٹھنے کا موقع ہواور تنہائی بھی ہو تو مناجات کریں،رورو کر مانگیں،رونا نہ بھی آئے تو رونے جیسی کیفیت بنا لیں،دل کو اللہ کی طرف مکمل متوجہ کرلیں۔
اپنی ضرورت کو کبھی بڑا نہ سمجھیں،اللہ کے سامنے کوئی ضرورت بھی بڑی نہیں،اعتماد کے ساتھ مانگیں،یقین کے ساتھ پکاریں،محبت کے ساتھ،پیار کے ساتھ،عاجزی کے ساتھ،انکساری کے ساتھ۔
اس کے خزانوں میں کوئی کمی نہیں۔
شکر کریں کہ ایسی ذات سے مانگنے کی توفیق حاصل ہورہی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جب مانگ لیا تو اب یہ نہیں کہنا کہ میری کوئی دعا قبول نہیں ہوتی،اتنا وقت گزر گیا۔
یاد رکھیں!اللہ کی ایک صفت" الحکیم "بھی ہے،وہ جانتا ہے کہ میرے لئے کیا بہتر ہے اور اگر بہتر ہے تو کس وقت بہتر ہے؟دینا بہتر ہے یا روک لینا بہتر ہے،زیادہ اچھی چیز دینا بہتر ہے یا آخرت میں اس کا اجر دینا بہتر ہے۔۔۔۔۔
دعا مانگنا نہ چھوڑیں۔۔۔
دل مانے نہ مانے،مانگتے رہیں،یہ کسی بھی حال میں فائدے سے خالی نہیں۔۔۔۔۔۔۔
کبھی دنیاوی فائدہ،کبھی دنیاوی اور اخروی فائدہ،کبھی صرف اخروی فائدہ،لیکن فائدے سے خالی نہیں۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
اپنی دعا کا بھی جائزہ لے لیں:
اللہ نے اس کائنات کا نظام چلانے کے لئے کچھ اصول مقرر کئے ہیں اور اللہ ان اصولوں میں تبدیلی نہیں کرتا۔۔۔۔
ایسی دعا نہ مانگیں جو ان اصولوں سے متصادم ہو۔۔۔۔
سمجھانے کے لئے کہ مثلاً مرد،عورت بننے کی دعا مانگے۔۔۔۔
سامنے جو پہاڑ ہے،اس کے سونے کے بن جانے کی دعا مانگی جائے۔۔۔۔
اسی طرح ایسی دعا بھی نہ مانگی جائے جس میں کسی کا نقصان ہو جیسے اس کا مکان چھن جائے یا اس کی موت کی دعا مانگی جائے یا اپنی موت کی دعا مانگی جائے۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اور آخری بات،
اگردعا جائز ہے،شریعت کی حدود کے اندر ہے،قانونِ الٰہی سے متصادم نہیں۔۔۔۔۔
توپھر خوش ہوجائیں۔۔۔۔
اورپھر بے فکر ہو کر مانگیں،اعتماد سے مانگیں۔۔۔۔
حالات کو دیکھ کر نہیں بلکہ اللہ کی قدرت کو سامنے رکھتے ہوئے مانگیں۔۔۔۔۔
یقین کے ساتھ مانگیں،بے یقینی کے ساتھ نہیں۔۔۔۔۔
دل سے مانگیں،بے دلی سے نہیں۔۔۔۔۔
یکسو ہوکر مانگیں،بے رُخی سے نہیں۔۔۔۔۔
یاد رکھیں!
اللہ ہر چیز پر قادر ہے۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زندگی کی ان محدود گھڑیوں سے پورا فائدہ اٹھائیں،ہرخوشی غمی،مشکل،تکلیف،حاجت،مشورہ،دکھ درد،خواہش کے لئے دعا میں لگ جائیں،الودود اور مالک الملک کے سامنے جھولی پھیلا دیں
اور
اس طرز کو اپنی زندگی کا لازمی جزو بنا لیں۔۔۔۔
اللہ میری اور آپ کی تمام جائز خواہشات عافیت کے ساتھ پوری فرما دے آمین۔۔۔۔۔
طالب دعا: عثمان اعوان
جمعہ مبارک